| تبليغات | X |
کوچه ده بیر قیز ،سورونور یوللاردا
دئیینیر آیاغی ،دلی سن،دلی !
بیتمیش گوروش چاغی سویله ییر کوچه و من :
"بیز گوروشه جه ییک قاش قارالاندا "
میزیلداییر دوداغی ،دلی سن،دلی !
یوخ کیمسه هوولاسین الینی ، گوموش آینالاردا ساهمانلامیش تئلینی
آینالاردا : هئی ی ی ی ی شاختادان کوزرمیش یاناغی ، دلی سن ،دلی ؟؟؟؟!
باخیر گوزلریمه ساتیجی اوغلان ، یانی ساچلاری یئلده داغیلان
بورادا گزیشن هر آخشام چاغی دلی سن ،دلی !
آوتوبوسلار گلیب گئچمیش ،دوراقدا بوش یئرینه دورموش
هله بوراخمامیش دوراغی دلی سن ،دلی !
گئدنلر گئتمیش ،ایزلر سیلینمیش
لاپ ال چاتمازلارا گوزونو تیکمیش ، سنده اوزوم سایاغی دلی سن ، دلی !
گلیر اوزاقلاردان گونشه بنزر بیریسی،اریییر ساچیمدا هر قار دانه سی
هوولاییر الیمی ایسسی نفسی
چیغیریر قوجاغی دلی سن ،دلی !!!!
او گونلر اوشاقدیق ، گوجسوز دایاقسیز
یوللار اوپ ـ اوزون
یوکلر بویوموزدان اوجا دوروردو
یاشام دویونلری برک ـ برک
ایکیمیزه بیر دویونو آچا بیلمزدیک
شیرین ـ شیرین اویونلار آجی اولوردو
سئوگیمیز تزه جه سینمیش سوموک تک
آیریلیغین ایسسی سی آووتدو بیزی
سوغوق صاباحلاردان خبرسیز قالدیق
اوگونلر اوشاقدیق !
اومودلاریمیزی قیریب دویونله ییردیک
آرتیق یاخینلاشیردیق آما
دوشونمه ییردیک
یوللار آووجلاریمیزدا قیسالماقدایدی
او قدر یوللارا دویون سالدیق کی ...
ایندی بویوموشوک
ایکیمیز بیر یئرده دویون دوشموشوک
یئترینجه سیخ ، آچیلماز
بیر دونمز یول کیمی، آخان سو کیمی قیتاریلماز
ایندی بویوموشوک
ایکیمیز بیر یئرده دویون دوشموشوک !!!
هله جیسارتیم یوخدو بیر داها
آدینی دیلیمه گتیر مه یه م
آخی
کویلو لردن اویرنمیشم کی
گره ک دوز ـ چوره یی ایتیر مه یه م !!!
اولدوزوموز قوشا آخدی ؟ آخمادی !
نده نلی آیریلیق یاخدی ؟ یاخمادی !
الین ساچیما گول تاخدی، تاخمادی...
دئییرلر : ساچیمدا دنی گؤرمه ییم
گؤزومون اؤنونده سنی گؤرمه ییم
شرفینه ... نئچه آت پیخلامیشام
نئچه مارال ،نئچه اوو اوخلامیشام
گؤیرچینیم ایچین ، دن ساخلامیشام
دئییرلر :آووجومدا دنی گؤرمه ییم
گؤزومون اؤنونده سنی گؤرمه ییم
کوچه دن قان یودوم هرگئجه سنسیز
ایکی فینجان یودوم هر گئجه سنسیز
خالقا یالان یودوم هر گئجه سنسیز
دئییرلر : بلکه گله نی گؤرمه ییم
گؤزومون اؤنونده سنی گؤرمه ییم
کسنه یول وئردین ، بیچه نه ایزین
آیریلیغی بیزه سئچه نه ایزین
یوخ دئییب ده ، قانیم ایچه نه ایزین
دئییرلر: گؤزومده هه نی گؤرمه ییم
گؤزومون اؤنونده سنی گؤرمه ییم
گؤزلریمه کفن گئیدیر قارداشیم !
اؤلوم وارکی، درددن یئیدیرقارداشیم !
کؤکسومه بیر نیسگیل دؤیدور قارداشیم !
دئمه سینلر: دار کفنی گؤرمه ییم
گؤزومون اؤنونده سنی گؤرمه ییم
...
کؤنلوم ارک کیمی بو آخشام !
ایچیمده آت چاپدیران بی لرین قاهقاهاسی
ایچیمده تاپدالانمیش گؤوده مین سسی
شوملانمیش سئودالارا دالیرام سئوگی !
یالقیزلیق آخینی یورویور بوآخشام
دؤیوش مئیدانیندا قان- ترایچینده
اؤدوللرقازاندیریرلارسنی اوتوزماغا
آل اؤرپه ییمده ماوی لییینین ایزی
هله ده آخشاملامایان ساچلاریملا
هله ده قامچیلانمیش اللریمله
سازیمی آیاق اوسته چالیرام سئوگی !
شوملانمیش سئودالارا دالیرام سئوگی !
سازیمی آیاق اوسته چالیرام سئوگی !
چیرپیلدی قاپیلار ، اوچدو کپنک
آراسیندا قالدی بیر قارتال غرور
داها زامان – زامان دوشونموشم کی ،
سنی جایناغیملا ساخلاماق اولمور.